CULTURE

Feminis lan an danje an Ayiti: lè mank konesans ak move pwopagann menase batay pou egalite a.

septembre 14, 2024
kerrydaniel275

Mouvman Feminis lan Andanje an Ayiti:

Nan dènye ane yo, feminis te vin tounen yon tèm popilè, espesyalman sou rezo sosyal yo kote anpil moun afime idantite feminis yo. Men, li gen yon lòt bò ki poze pwoblèm: moun sa yo pa gen okenn konesans reyèl sou istwa ak ideyoloji mouvman feminis la, pi souvan, yo pa angaje nan okenn òganizasyon fanm ki fè travay reyèl sou teren an. Anpil nan yo sèvi ak etikèt « feminis » la pou kreye yon imaj pèsonèl oswa atire yon sèten nivo vizibilite, men aksyon yo ka fè plis mal pase byen pou batay feminis an Ayiti. Nan atik sa a, n ap eksplore kijan kalite swa dizan feminis sa yo reprezante yon danje pou mouvman fanm an Ayiti.

Mizik Fè Bri Pa Danse: Lè Mo « Feminis » la pèdi sans li

Feminis lan, ki se yon mouvman istorik ak mondyal ki ap defann dwa fanm yo, egalite sèks, ak jistis sosyal, te toujou ap goumen kont opresyon ak inegalite. Sepandan, lè moun ki pa konprann oswa pa respekte esans mouvman an itilize etikèt « feminis » la, sa lakòz yon movèz konpreyansyon nan sosyete a. Anpil nan moun sa yo se swa dizan feminis sou entènèt la ki pa konekte ak reyalite a, ki pa konprann ideyoloji a, epi ki pa kolabore ak lòt òganizasyon ak regwoupman fanm ki ap fè yon travay pwòp pou amelyore lavi fanm yo nan kominote yo.

Kalite angajman sa a, ki sèlman baze sou yon prezans sou entènèt, kontribye pou feminis la vin yon tèm vid san sans, epi sa lakòz moun gen difikilte pou fè diferans ant yon feminis ki vrèman angaje ak yon moun k ap pran poz pou sanble « woke. » Kòm rezilta, li devalorize mouvman an epi li fè pèp la pè feminis. Anplis de sa, sa ka fè moun ki enterese nan feminis yo santi ke mouvman an pa aksesib oswa ke li pa reprezante yo.

Lè Pwopagann Vin Yon Zouti Kontre Pwòp Kòz la

Youn nan efè ki pi danjere nan kalite swa dizan feminis sa yo se kreye laperèz ak prejije kont mouvman an. Lè moun ki pa konprann feminis pwomouvwa lide tankou « feminis lan se anti-gason » oswa ke feminis la vle « enpoze fi omoseksyalite, » yo ranfòse yon naratif ki deja egziste ki chèche diminye mouvman an. Sa vin fè feminis parèt tankou yon menas pou balans sosyal ak kiltirèl nan peyi a.

Nan yon sosyete tankou Ayiti, kote machismo ak tradisyonalis toujou gen yon gwo pwa, kalite propagann sa a kapab fè anpil moun tounen do bay feminis epi wè li kòm yon bagay ki pral « detwi fanmi an, » « divize kominote a, » oswa « kowonpi valè yo. » Se yon echèk gwo pou mouvman an paske sa anpeche posiblite yon dyalòg pwodiktif ki ta ka mennen nan chanjman reyèl ak soutenab pou fanm yo.

Yon Apèl pou Edikasyon, Angajman Reyèl, ak Solidarite

Feminis lan pa yon etid estil oswa de pwomotè ego; se yon batay ki mande angajman reyèl, travay an pwofondè, ak solidarite avèk lòt fanm ak alye ki chèche reyalize chanjman sosyal. Se pou rezon sa a li enpòtan ke fanm ki idantifye kòm feminis yo edike tèt yo sou istwa, objektif, ak batay mouvman feminis la. Sa mande pou patisipe nan òganizasyon ak regwoupman fanm lokal yo, angaje nan reyinyon, diskisyon, e menm nan manifestasyon ki vize atire atansyon sou pwoblèm fondamantal ki afekte lavi fanm ak tifi yo nan sosyete an.

Yon feminis ki baze sou konesans e ki byen ekipe ak enfòmasyon ap kapab dekonstwi manti ak estereyotip ki fè anpil moun gen yon malantandi sou mouvman an. Sa ka fèt atravè edikasyon kominotè, diskisyon ouvè, ak montre kijan feminis la chache egalite ak respè mityèl pou tout moun, pa sèlman fanm.

An konklizyon: Sove Mouvman an Pou Li Ka Sove Sosyete a

Pou feminis la reyisi nan peyi tankou Ayiti, kote gen anpil inegalite sèks ak enjistis sosyal, li dwe rete yon mouvman ki byen defini, ki klè, epi ki konekte ak reyalite moun yo. Sa mande yon efò konsyaman pou dekontamine feminis la de tout lide ki chèche detounen li. Swa dizan feminis sou nèt la, ki pa gen okenn angajman reyèl ak mouvman an, ka fè plis mal pase byen; se poutèt sa li enpòtan pou moun ki enterese nan feminis aprann, angaje yo reyèlman, epi sipòte travay fanm ki deja ap fè batay la sou teren an. San sa, feminis la ka sèlman vin tounen yon slogan vid ki pèdi fòs li nan yon moman kote li nesesè plis pase tout tan.

Pou sila a yo ki bezwen adere oubyen chache konnen enfòmasyon sou kesyon feminis nou kapab ekri « Mail » òganizasyon fanm sa yo k ap fon travay nan lavi nasyonal lan tankou : Nègès Mawon ,FondationToya, marijàn pou n site sa yo sèlman.
negesmawon.org@gmail.com /fondation.toya@yahoo.fr /contact@marijanayiti.org.

You might also like:

En savoir plus sur Yogann Magazine

Subscribe to get the latest posts sent to your email.