Société

Atou Koperasyon nan Kreyasyon Antrepriz

septembre 13, 2024
allifleursam

Jodi a, nou pral pale de avantaj koperasyon nan kreyasyon antrepriz. Men anvan, nou pral fè yon ti egzèsis pratik. Pran yon kantite diri kri selon kapasite ou, mete li nan yon bòl. Sèvi ak yon sèl dwèt pou eseye trape grenn diri yo. Verifye konbyen grenn ou reyisi pran. Kounya, sèvi ak de dwèt, konte konbyen grenn ou reyisi pran. Kontinye ak twa dwèt, kat, senk, jiskaske ou itilize toude men ou.

Èske ou remake ke plis dwèt ou itilize, plis li te fasil pou trape yon pi gwo kantite diri? Yon sèl dwèt pa manje kalalou. Avèk yon dwèt ou ka goute, men ou pap ka pran anpil.

Koperasyon nan Antreprenarya

Se menm jan ak antreprenarya. Ou ka envesti pou kont ou, men si ou vle reyisi, li pi bon pou antoure ou ak moun de kalite. Souvan, moun ki gen bon lide pa gen kòb, moun ki gen kòb pa gen tan pou travay, epi moun ki disponib pou travay pa gen ni lide, ni kòb. Sa vle di pou reyalize yon pwojè, ou bezwen konbine fòs ak lòt moun.

Sipoze ke Mesye Roger bezwen 1,000,000 goud pou li kòmanse yon antrepriz pwodiksyon pwason dlo dous. Si li pou kont li, sa ap reprezante yon gwo risk pou li, e li pap fasil jwenn montan sa a. Men si li jwenn yon lòt moun pou mete ansanm avè l, chak moun ap mete 500,000 goud. Si gen dis moun, chak moun ap mete sèlman 100,000 goud. Sa pi fasil.

Imajine kounya ke yo divize yon milyon goud sa a an 1,000 pati sosyal, chak pati koute 1,000 goud. Yo ka kreye yon sosyete swa a responsablite limite oswa yon sosyete anonim. Nan modèl sa a, plis moun gen kapasite pou envesti, paske 1,000 goud pi aksesib pase 100,000 goud. Moun ki envesti nan pwojè sa a yo vin aksyonè nan antrepriz la, e risk la pi piti pou chak moun paske montan envestisman an piti.

Mod Finansman pou Antrepriz Peyi a

Se mod finansman sa yo nou bezwen itilize si nou vle peyi a avanse. Chak moun ki achte yon pati sosyal nan antrepriz la ap bezwen konsyan ke se yon plasman a long tèm. Lajan yo envesti a ap retounen nan fòm dividen, ki depann de benefis antrepriz la fè chak ane. Benefis yo rive apre tout depans antrepriz la fin peye, tankou salè travayè yo ak salè antreprenè a si li gen yon pòs nan antrepriz la.

Dividann sa yo se sa ekonomis yo rele « randman sou envestisman ». An mwayèn, li ka reprezante ant 3% a 5% montan envestisman an pa ane. Gen ka kote antrepriz la deside pa distribye dividann, men pito entegre benefis yo nan kapital antrepriz la pou devlopman li.

Antreprenè a, menm si li envesti lajan nan antrepriz la, dwe respekte prensip ke li se yon salarye, e li pa ka foure men nan lajan antrepriz la jan li vle. Richès antrepriz la pa richès li pèsonèlman. Se inikman pati sosyal li posede ki reprezante richès li. Li ka vann pati sa yo si li vle, men se dapre règleman asanble jeneral aksyonè yo.

Avèk Koperasyon, Antrepriz Ka Kreye Plis Richès

Nan konteks Ayiti, plis nou adopte prensip travay ansanm nan antreprenarya, plis nap ka kreye gwo antrepriz ki ka bay travay nan kominote a. Yon egzanp se Tesla, kote Elon Musk posede sèlman 12.89% nan antrepriz la, epi 10 pi gwo aksyonè yo posede sèlman 35% ansanm (Sous: Statista, jen 2024).

Pou yon sosyete fonksyone byen, li nesesè mete anplas bonjan mekanis jesyon, tankou kontabilite serye, kontwòl sikilasyon lajan, transparans ak entegrite. Yon Konsèy Administrasyon dwe la pou veye sou respè règ antrepriz la, pandan ke Asanble Jeneral aksyonè yo responsab pou valide kontablite antrepriz la chak ane. Asanble a ka pran desizyon sou si yo pral pataje benefis yo oswa si yo pral entegre yo nan kapital antrepriz la.

Depi antrepriz la fè yon gwo volim chif dafè, yon oditè ekstèn ta dwe verifye kont antrepriz la chak ane pou asire transparans nan jesyon lajan an.

Ki Sa Nap Bezwen Pou Fasilite Travay Nan Peyi a?

  • Nap bezwen kreye plis ak pi gwo antrepriz.
  • Nap bezwen antreprann ansanm pou mobilize finansman.
  • Nap bezwen amelyore jesyon ak gouvènans antrepriz nou yo.
  • Nap bezwen ogmante kapasite antreprenè nou yo.
  • Pi enpòtan toujou, nou bezwen aji.

Se sèlman lè nou kolabore ke nou ka fè biznis ki pi pwofitab e ki ka kreye plis travay nan kominote nou yo.

You might also like:

En savoir plus sur Yogann Magazine

Subscribe to get the latest posts sent to your email.